البارحة جاني من الحـب مرسـال

وافي العشره · 10-25-2007, 02:38 PM


	اعجبتني هذه القصيده مثل العاده وحبيت انقلها لكم لانكم اغلى ناس عندي البارحة جاني من الحـب مرسـال من عقب ما بينـي وبينـه خصيمـة وانا ترى في الحـب مانيـب فعّـال ولا بعـد ولّـع بقلـبـي هشيـمـه ولا بعد غنّيت فـي ساعـة وصـال ولا بعـد ذقـت الفـراق وجحيـمـه ولا جرى دمعي على الخـد همّـال ولابعـد جربـت مــرّ الهزيـمـة حتى وردنـي تالـي الليـل جـوال وانا على شاهـي وبسكـوت ديمـة الرقم بايـخ لكـن الصـوت قتـال كنه مثـل صـوت المذيعـة حليمـة قالت مساء الخير يا طيّـب الفـال قلـت ارحبـي ترحيبـةٍ مستديـمـة بالعود والصفـري ودلـة وفنجـال واجبك يـا بنـت الأصـول الكريمـة ردت بضحكة ثم قالت وش الحـال؟ قلت اشهد إن الحـال عقبـك سقيمـة قالت وهي تضحك بعد مثل الأطفـال وانـا بعـد كنـي بدونـك يتيـمـة من يـوم قالتهـا تزلزلـت زلـزال من فجعتـي كنـي مسـوي جريمـة قلت ارفعي صوتك ترى مابه ارسال كـذاب لكـنّ المصيـبـة عظيـمـة قالت أقول اسمع ترى هرجنا طـال ممكـن تصاحبنـي ترانـي وسيمـة واسمي الحقيقي أول حروفه الـدال لكـن يسمّونـي البنـات الزعيـمـة صحيح أحب الفخفخة واعشق المال لكـن ترانـي طـاهـرة مستقيـمـة ما عندي امغازل ولا (لعـب يهّـال) ما عندي إلا في الشـرف والحشيمـة بس الصراحة قلبي لشوفتـك مـال واصبحت وحدك جالسٍ فـي صميمـه فكّر بعقلك واتـرك القيـل والقـال واحذر تطيع اهـل العقـول العقيمـة وارسل علي الحين خمسمية ريـال أشحـن بهـا جـوال أختـي غنيمـة أو طقم غالي فيه خاتـم وسلسـال أروح بـه فـي عـرس ولاّ عزيمـة قلت الحقيقة مانيـب رجـل أعمـال ولانـي بتاجـر والمـوارد عديـمـة أنا الصراحة شبـه عطّـال بطّـال وعلاقتـي بالفقـر جــداً حميـمـة والراتب الله يرحم الحـال مـا زال محدود والمصـروف ربـي عليمـه والديـن بـالآلاف والبنـك شغّـال ياكـل فلوسـي بالربـا والظليـمـة والسوق طايح والغلا ضيّـق البـال والموت والله صايـر اكبـر غنيمـة قالت تحمّل بـس والحمـل ينشـال خلك شديد البـاس صلـب العزيمـة ياخي تصرّف جعلك اتصيـر نشّـال أهـم شـي إن النـوايـا سليـمـة لابد تفهمنـي علـى كـل الأحـوال ما دمت من أهـل العقـول الفهيمـة قلت إيه والله فاهم اللي على البـال لكـن تـرى هـذي علينـا قديـمـة يا بنت هـذا صايـر اليـوم مـوال للي تبي تلعـب علـى ابـن اللئيمـة يا بنت ما تدرين كـم فيـه محتـال يلعب على الحبلين وانتـي غشيمـة يا بنت كم من جاهلة دمعهـا سـال من عقب ما جات العواقـب وخيمـة والبنت لا اقفى عرضها بيد الأنـذال والله مـا يبقـى لـهـا أي قيـمـة قالت تبـي ولاّ فخلّـك علـى جـال مهـوب ناقصـي نصايـح حكيـمـة عز الله إنك للأسـف منـت رجّـال وانك قليل الـذوق مـا فيـك شيمـة يا لعنبو اللي مـا يسطّـرك بنعـال حتـى يعلمـك الغـزل يـا بهيـمـة ( تفو ) عليك وصكّت الخط في الحال مدري ( تفو ) هي مـدح ولاّ شتيمـة اخوكم ومحبكم / وافي العشره

ShowTime · 10-25-2007, 03:29 PM

ههههههههههه صراحة قصيدة ولا اروع

صح لسان قائلها وسلمت يداك على النقل

يعطيك العافية وافي العشره

ولك تحياتي

وافي العشره · 10-25-2007, 05:25 PM

هلا اخي شوتايم منور بمشاركتك وحضورك

الله لا يحرمنا منك

تقبل ارق التحيه

ميـ Myasim ـآسم · 10-25-2007, 06:13 PM

ههههههههههههههههههههه

يعطيك العاااااااااافيه

ولاتحرمنا جديدك

عاشق الازرق · 10-25-2007, 09:36 PM

يا بنت كم من جاهلة دمعهـا سـال

من عقب ما جات العواقـب وخيمـة

تسلم يدينك وافي يعطيك العافيه

وافي العشره · 10-25-2007, 11:44 PM

الاخت مياسم ضحكه دائمه ههههه

شرفتيني واسعدتيني بمرورك الكريم

الله لايحرمنا منك ومن طلاتك علينا

تقبلي الر واحلى تحيه

----------------------------------------------

الاخ عاشق الازرق
العفو اخي عاشق واشكر لك مرورك الكريم
لاعدمناك

تقبل ارق التحيه

rshed · 10-26-2007, 12:59 AM

إقتباس


	مدري ( تفو ) هي مـدح ولاّ شتيمـة

شتيمه !!! ... الله لايهيـنك

قصيده مطنوخه

تسلم ياوافي العشره

عذبة المبسم · 10-26-2007, 02:59 AM

وافي العشره
يسلمووو على النقل الرائع
ومشكور على الاحساس الصادق

اختك ..عذبة المبسم

عنيدالنت · 10-26-2007, 09:34 PM

مشكور على القصيده الجميله