اذا جرحك

اذا جرحك بدا ينزف.. تعال يضمده جرحي
واذا دمعك بدا يعصف فهذا الكف منديلك

تعال نسابق اللحظه.. وجدد فرحك وفرحي
وعلمني كلام الحب.. علمني مواويلك




الكف والفنجان


قريت الكف والفنجان.. وشفت دروب قدامي
دروبٍ كلها لوعه.. واشياء غير مفهومه

مشيت وجيت ابي ارجع.. واعود لسالف ايامي
عجزت ارجع وفي كفي خطوط الهم مرسومه



تعازي


عزّاه للي وحيد ومامعه صاحب
يسهر.. ينادي.. ويرجع بالصدى صوته

وعزّاه للي حزين ومنوته غايب
لحظة وليفه يفارق كنها موته



طعنات


طعنة(ن) من بعد طعنه.. ما انت بأول من طعن
غير انك بالصراحه صرت تطعن في العميق!!

يكفي اني لاذكرتك لي عيون(ن) يدمعن
لاحبيب(ن) بعد حبك.. لامود ولا صديق

والفرح وايامه اللي كانت اول ودعن
صرت وحدي في طريق وصرت وحدك في طريق

خلها ذيك المدامع من عذابك يشبعن
لا ابو من كان يزعل.. لا ابو من هو يضيق





قل اي شي


قل اي شي ياصاحبي.. تراه خير من السكوت
اخاف دنيانا تمر ياصاح واحنا ساكتين

حتى ولو في خاطرك كلام يجرحني واموت
قل لايهمك كلنا عند النهايه ميتين


هذا انا


هذا انا جيتك على وعد(ن) قطعته بالحضور
رغم الذي منك جرى جيتك ابين لك وفاي

هذا انا في طيبتي.. في رقتي صدق الشعور
اسأل عيوني كم تحب؟ واسأل عروقي كم ضماي؟!


امنيات

يمنيني بحبه لي ويحلف لي وهو كذّاب
وانا والله ماذقت العذاب الاّ على اعتابه

صحيح انه بنظراته يثير الشوق والاعجاب
ولكنه مع ذلك يوقفني على بابه..............