مساء الخير والورد
ها انا ابحث عن الشرف بما اضع بين ايديكم
عندما تغيرت علي ضحكته وعلمت ان وراءها شيئا ما !!!
يابو حمد .. لاشفت عينك وش اشوف
عينٍ تشوف الدمع ماهوب كافي
فيها عناوين الذي كنّ بالجوف
مدلولها .. متى نهاية مطافي ؟
الياس فيها بيّنٍ كنه حروف
على عديم العلم ماهوب خافي
لك سجةٍ تنبي عن الحزن والخوف
حزنٍ غشاك ومن دوامه تخافي
حتى عدوك لو يشوفك بك يروف
لو كان ماياوي . ولا يوم رافي
وش غيَّرَ النسناس ثم صار عاصوف
ونغّص على اهل الكيف ماكان صافي
العام قلبك شرح لو كنت مصدوف
ماصار فيه من الصدوف اختلافي
ماقد خنع يومِ ولا جزع لظروف
حتى ولو عادت سمانه عجافي
واليوم يلقى نزعة الشوك بالصوف
من كل مايطري صوابه يشافي
والخوف لاتفرح ليا صار مكشوف
ناسٍ تباشر باكتشاف الخوافي
اخفيت علمك عني بوسط مظروف
يابوحمد بالله شق الغلافي
مانيب يوم انشد عن الحال ملقوف
انا الرفيق اللي برفقتك وافي
وانا الذي لو صابك الوقت بصدوف
كنه قسمها بيننا بالنصافي
عيني ليا ضاق الفضا ليّك تطوف
جفنٍ لك فراشٍ وجفنٍ لحافي
الا ليا صار البلا حب غطروف
اعذر ترى مااقدر ولا نيب شافي
حيث ان قلبي من هوى البيض مخطوف
وما يعطي الحذيان من سار حافي
والا الردي يقول مانيب مكلوف
لاشاف ماتشكي ويعطيك قافي
تم الكلام اللي من الماس مصروف
غالي ولو هو من حمول خفافي
ختمه صلاة الله على خير معروف
بالدين ماصلى المصلي وطافي
وسلامتكم
02-05-2008, 04:32 PM
عنــــوانها بيــن السطـــــور
