لاجل غلاك أصبر على الحرمان وجروح النوى = وإلا فلا لي غير قربك لو تخيرت اختيار
ما اقول لك على اختيار الصد .. لا .. مالك لوا = توك صغيرة تحسبين الحب يحسم في قرار
مادام مفهوم الهوى عندي وعندك ما استوى = ما احمّل قلوب الصغار جروح وهموم الكبار
كفاية انه هزك العنوان قبل المحتوى = وإنك عرفتي باختلاف الحب عن لعب الصغار
تاهت بك الأريا بعد غشاك بعضه وانزوى = قلبك وقدرت الظروف وشمت لا العبها قمار
حلاتك ان جيتي ( وله ) تمشين درب ٍ ما التوى = يسوقك الشوق الذي أجاهده بالانتظار
اليوم وبكرة والذي بعده تباشير الهوى = مادامت الايام دربك لي واشوفك بالمسار
ماتذكرين البذرة اللي قد بذرناها سوا ؟ = ( على نجم ) في روضة العشاق ( رابعة النهار )
أبشرك ماحُجبت (إ) عْن الشمس والما والهوا = الله يذريها عن السموم واسباب البوار
اليا سقتها ديمة الاشواق والعرق ارتوى = والجذع ساق وفرّعن غْصونه يْمين ويسار
وميلت لك بظلالها غصن ٍ رطيب ٍ ماذوى = يافرحة الزراع تحت ظلالها بجني الثمار
عرفتي اللي ماقسى ولا نسى ولا نوى = يرخص غلاك اللي شراه وقيمته ماتستعار
واليا طرت لك ذكريات اللي مضى باللي حوى = وصرتي تخافين العتاب وتسبقينه باعتذار
همست لك ترى العذاب لحاله اللي انطوى = واللي بقى وصف الغلا اللي كل يوم بازدهار