السلام عليكم ورحمة الله وبركاته
احب ان اعرفكم على شاعر له باعا في الشعر
انه الشاعر احمد الشايع
لا يسعني ذكرة ولكن استوقفتني مرثية لابنه الكبير الذي توفي
شاعرنا الكبير في موهبته وعطائه الشعري وبإنسانيته
وتعامله الراقي
مع الجميع أحمد الناصر الشايع فجع قبل شهر أو أكثر بموت ابنه الأكبر الشاعر
محمد الأحمد الشايع رحمة الله وقد شاركه أحزانه الكثير من أبناء هذا الوطن بمختلف فئاتهم
لكن يبقاء حزن الأب لفقد ابنه اكبر من كل شيء رغم اليقين الصادق
بان الموت نهاية كل حي ..شاعرنا كتب هذه القصيدة الرثائية الباكية
يا بعد نوم الليل عن حجر عيني
صبر على ما صار من وال الأقدار
صبرت صبر باح منه الكنيني
اضحك مع العالم وكني على نار
ما غير اهوجس بين نفسي وبيني
يعلم بها العلام في كل الأسرار
تقل أتحرى لي علوم تجيني
مع الطروش اللي يجيبون الأخبار
فهمت رأس العلم من كلمتيني
من يوم قالوا جا محمد ونصار
تكسرت عقبة جرايد يميني
عز الله عني عقب ما صار صبار
من عقبها ونيت لي ونتيني
ونة غريب بالخلا ضاع واحتار
لولا الله ابرك ثم قوة يقيني
لا طير مثل الطير من كف صقار
تخنقني العبره وافرك يديني
واحترت مثل مصالي النار والغار
علم يخلي كل قاسي يليني
كنه على قلبي رصاص أم كرار
إلي ذكرت عياله المصغريني
هذا يعزمهم وهذاك زوار
احد على جنبه واحد له ونيني
جتني هموم القلب من كل الأقطار
قلت اصبروا والله مع الصابريني
الله يكافيكم صواديف الأشرار
عسى عوضنا الحي بالميتيني
ناصر ونايف ذخرا سر واجهار
واحمد وعبدالله ذرانا الحصيني
صغار السن وان بدا اللازم كبار
يجبر عزاي اللي بخلفه ضميني
محيي العروق الميتة بعد الأمطار
مالي عن المكتوب فوق الجبيني
لو رحت شرق وغرب ويمين ويسار
صليت نصف الليل لي ركعتين
اطلب له اللي للخطيات غفار
خفف ذنوبه يا ارحم الراحميني
في ماقف ما ينفعن فيه الأعذار
جعله برضوانك من الفايزيني
بالماقف به يضيعن الأفكار
في ماقف به كل خافي يبيني
تمت وصلى الله على سيد الأبرار
وتقبلوا تحياتي :
فــارس الــقــحــطــاني
03-15-2006, 08:48 AM
يا بعد نوم الليل عن حجر عيني
